DYNAMIC ART PRODUCTIONS – ዳይናሚክ ኣርት ፕሮዳክሽንስ

መንግስቲ ብሪጣንያ ኣብ ውሽጢ ሒደት ኣዋርሕ፡ ኣብ ትግራይ ከቢድ ኲናት ዘስዕብ ዓጸቦ ክኽሰት ከም ዝኽእል ኣጠንቂቑፍሉይ ልኡኽ ምክልኻል ዓጸቦ ፡ ኒክ ዳየር፡ ኣብቲ ብኲናት ዕንወት ዝወርዶ ዘሎ ክልል፡ ኣብ ዝገበሮ ዑደት እዩ ነቲ ግምገማ ኣካዪዱ።ብመሰረት ሚስተር ዳየር ዘቕረቦ መብርሂ፡ ኣብቲ ክልል ጸብጻባት ቅትለትን ጾታዊ ዓመጽን ከም ዘሎ ብምግላጽ፡ ተጻብኦታት ይቕጽል ምህላው እውን ሓቢሩ።

ኣብ ልዕሊ መሳርሒታት ሕርሻ፡ ንዘርኢ ዝተኸዘነ እኽሊ፡ ከምኡ’ውን ዓድታት ብምሉእ ዕንወት ከም ዝተፈጸመ ብምግላጽ፤ ብምኽንያት ምዕጻው ጽርግያታትን በረራታትን ኣብቲ ክልል፡ ብዙሕ ህዝቢ ክብጻሕ ከም ዘይተኻእለ ኣብሪሁ።ጥዕና ዘይምርካብ ማዕረ ጥሜት ኣስጋኢ እዩ ዝበለ ሚስተር ዳየር፡ ብፍላይ ኣብ ዝበዝሓ ማእከላት ጥዕና እቲ ክልል፡ ዝበጽሐ ዕንወት ዝያዳ ኣሻቓሊ ምዃኑ ገሊጹ።

ኣብ ዝሓለፈ ሰሙን ሓላፊት ትካል ረድኤት ኣመሪካ ዩኤስኤይድ’ውን፡ ኣብ ሰሜናዊ ኢትዮጵያ፡ ክልል ትግራይ “ሓያል ጥሜት” ተኸሲቱ ምህላው ኣጠንቂቓ ነይራ።

ሰማንታ ፓወር፡ ብትዊተር ኣብ ዝዘርግሐቶ መልእኽቲ፡ ህጹጽ ትካል ምክትታል መግቢ ኣመሪካ፡ ኣብ ትግራይ ብሰንኪ እቲ ዝቕጽለ ዘሎ ጎንጺ፡ ከቢድ ስእነት መግቢ” ተኸሲቱ ምህላው፡ ድማ ገሊጻ

“መንግስቲ ኢትዮጵያ ሕጂ ነቲ ኲናት ደው ከብልን ንሰራሕተኛታት ረድኤት መገዲ ክኽፈትን” ድማ ጸዊዓ።

ብመሰረት ጸብጻብ ፕሮግራም መግቢ ሕቡራት ሃገራት፡ ኣብ ትግራይ 5.2 ሚልዮን ሰባት ናይ መግቢ ሓገዝ የድልዮም ኣሎ።
እዚ ከይኣክል፣ ካብ ዞባ ምዕራብ ትግራይ ተፈናቒሎም፡ ኣብ ከተማ ሽረ ኣብ ዝተፈላለዩ ኣብያተ-ትምህርቲ ተዓቚቦም ካብ ዝነበሩ ተፈናቐልቲ፡ ብኣማኢት ዝቑጸሩ ደቂ ተባዕትዮ ብሰነይ ብወተሃደራት ኢትዮጵያን ኤርትራን ተወሲዶም ከምዝተኣሰሩ ናይ ዓይኒ መሰኻኽር ንቢቢሲ ገሊጾም፡፡እቶም ወተሃደራት ናብቶም መዕቆቢታት ብምእታው ንደቂ ተባዕትዮ ጥራሕ ከካብ ዝነብሩሉ ክፍሊታት እናውጽኡ ንገሊኦም ብመካይን ንገሊኦም ድማ ብእግሮም ኣሰሊፎም ከምዝወሰዱዎም ብምግላጽ፡ ነቶም ስደተኛታት ይቕጥቅጡዎም ከም ዝነበሩ እቶም መሰኻኽር ሓቢሮም፡፡

ልኡኽ ኣውሮጳዊ ሕብረት ኣብ ኢትዮጵያ፡ ነቲ ጸብጻብ ኣመልኪቱ ኣብ ትዊተር ኣብ ዝሃቦ ምላሽ,፡ እቲ ጸብጻብ “ኣዝዩ ረባሺ” ምዃኑ ብምግላጽ፡ “ነቲ ኩነታት ንምብራህ ነጻን ቅልጡፍን መርመራ ክግበር ከም ዘድልይ” ሓቢሩ።

ሰራዊት ኢትዮጵያ ንቢቢሲ ኣብ ዝሃቦ ምላሽ ግና ተፈናቐልቲ ናይ ምእሳር “ተግባር ክፍጽም ዘይክእል” ምዃኑ ብምግላጽ፡ ነቶም ጸብጻባት “ዝተፋሕሰ” ክብል ገሊጽዎ ኣሎ።

ዋና ኢታማጆር ጀነራል ብርሃኑ ጁላ፡ ወተሃደራት ኤርትራ ካብ መሬት ትግራይ ሙሉእ ብሙሉእ ንኽወጽእ ዝሓትት ደብዳቤ፡ ናብ መንግስቲ ኤርትራ ከምዝለኣኸ፡ ብሉምበርግ ገሊጻ።

ናይ’ቲ ጀነራል ፊርማ ዘለዎ ደብዳቤ፡ ቅድሚ ቅሩብ መዓልታት፡ ናብ ሚኒስተር ሚኒስትሪ ምክልኻል ኤርትራ፡ ጀነራል ፊሊጶስ ወለደዮሃንስ ከም ዝተላእኸ አታ ማዕከን ዜና ትገልጽ።እዚ ናይ ጀነራል ብርሃኑ ጁላ ደብዳቤ፡ ምስ ናይ ኣሜርካ ብይን እገዳ፡ ኣብ ልዕሊ ሰበ-ስልጣን ክልቲኤን ሃገራት ተተሓሒዙ ይርአ።

ወትተሃደራት ኤርትራ፡ ኣብ ክልል ትግራይ ብጣዕሚ ከበድቲ ምዃኖም ዝተነግረሎም ጃምላዊ ቅትለት፡ ዓመጽ፡ ምዝራፍ ንብረትን ዕንወት ትሕተ ቅርጽን የካይድ ከምዘሎ ዝንገር’ዩ።ነዚ ኩሉ ገበናት ብምኽሓድ፡ ወተሃደራት ኤርትራ፡ ብፍጹም ኣብ መሬት ትግራይ ኣይኣተወን ክብሉ ዝሓገዩ ሰበ-ስልጣን ኢትዮጵያ፡ ግዳይ እገዳ ኮይኖም ኣለዉ።

ቀዳማይ ሚኒስተር ኣብይ ኣሕመድ፡ ቅድሚ ኣዋርሕ፡ ኣብ ፓርላማ ዝሃቦ መግለጽን ምስ ዋና ጸሓፊ ሕቡራት ሃገራት ኣንቶንዮ ጉተሬስ፡ ኣብ ዝገበርዎ ዝርርብን፡ ኣብ መሬት ትግራይ ከምዘየለ ዘረጋግጽ’ዩ ኔሩ። ኣብ እዋኑ፡ በዚ ዝተፈብረኸ ሓበሬታ ዋና ጸሓፊ ኣንቶንዮ ጉተሬስ፡ ንማሕበረ ሰብ ዓለም ግጉይ መግለጺ ሂቡ ምንባሩ ይዝከር።

መንግስቲ ኢትዮጵያ፡ ኣብቲ ድሕሪ ቁሩብ ሳምንታት ከምዘካይዶ ዝገለጾ ምርጫ፡ ምርጫ ዘብይካየደሎም ከባቢታት ይበዝሑ’ለዉ። ኣቐዲሙ ኣብ ክልል ትግራይ ምርጫ ከምዘይካየድ ውሁብ ተወሲዱ ዝጸንሐ ኮይኑ፡ ዝተፈላለዩ ናይ’ታ ሃገር ፖለቲከኛታት ኣብ ክልል ኦሮሞ፡ ንሓደ ፓርቲ ጥራይ ዘወዳድር ምርጫ ከመይ’ሉ ምርጫ ይበሃል ክብሉ ተሰሚዖም’ዮም።

ትማሊ፡ ሃገራዊ ምርጫ ቦርድ ኢትዮጵያ ኣብ ዘውጸኦ መግለጺ፡ ኣብ ዝተፈላለያ ከባቢታት አታ ሃገር ምርጫ ከምዘይካየድ’ዩ ዝሕብር።

ኣብቲ ብሰንኪ፡ ጸጥታዊ ሽግርን ናይ መረጽቲ ምዝገባ፡ ዝተቛረጸንን ዘይተኻይደለንን ምዃነን ዝገለጸን ከባቢታት፡ ልዕሊ ሸሞንተ ናይ ኣምሓራ ክልል ዓድታት ዝርከብአን፡ ጠቅላላ ልዕሊ ዕስራ ከባቢታት ምዃነን ተፈሊጡ።

ምክትል ሚኒስተር ወጻኢ ጉዳያት ኢትዮጵያ ነበር፣”ፕረዚደንት ኢሳይያስ ኣፈወርቅን ቀዳማይ ሚንስተር ኣብይ ኣሕመድን፡ ብዛዕባ ምፍታሕ ሽግር ህዝብታት ክልቲኤን ሃገራት ተዛሪቦም ኣይፈልጡን’ዮም።” ኢሉ

መራሕቲ ክልቲኤን ሃገራት፡ ህዝብታት ክልቲኤን ሃገራት ብዝደልይዎ ዝነበሩ፡ ናይ ሰላም ስምምዕ ተሸፊኖም፡ ንህወሓት ብኸመይ ነጥፍእ’ምበር ንምዕባለ ህዝብታት ክልቲኤን ሃገራት ሓሲቦም ኣይፈላጡን’ዮም። ዝበለ ኣምበሳደር ብርሃነ ገብረክርስቶስ።ኣብ’ዚ ጉዳይ ሰበ ስልጣን ኣምሓራ ክልልን ፕረዚደንት ሶማል,፡ ፎርማጆ ክሳብ ጎንደር ብምምጻእ ከም ዝተዛተይሉ ገሊጹ።

ኣብ’ዚ ዝሓለፈ 3ተ ዓመታት ህዝቢ ትግራይ ዝተፈልየ ስምዒት ንኽሓድሮ ዝገብር፡ መንገዲ ምዕጻው፡ ንኣውፈርትን ኣምበሳደራትን ናብ መቐለ ጉዕዞ ምኽልካልን፡ ባጀት ምእጋድን ካልእ ነገራትን ኪገብሩ ምጽነሖም ወሲኹ የረድእ።
ቀዳማይ ሚኒስተር ኣብይ ኣሕመድ፡ ኣብ ገሌ፡ ብኣፋን ኦሮሞ፡ ዓፊንና ሒዝናዮም ኢና ናብ ዝንቀሳቐስዎ የለን፡ ክብል ዘስመዖ መደረ መርኣያ ናይ’ዚዩ ኢሉ።

ካብ ግሪክ ናብ ሉቱወኒያ ትጓዓዝ ዝነበረት ነፋሪት መጓዓዝያ ኣብ ቤላሩስ ዓሊባ ንሰዓታት ኣብኡ ክትጸንሕ ከምዝተገደደት ተገሊጹ።እታ ነፋሪት ትዓርፈሉ ቦታ ክቕይር ዝተገበረ ካብ ሞንጎ ተጓዓዝቲ ሓደ ንዝነበረ ጋዜጠኛ ንምሓዝ ምዃኑ ተጣበቕቲ መሰላት ሓቢሮም።በቲ ተግባር ዝተቖጥዓ ሃገራት ኣውሮጳ፡ “ብመንግስቲ ዝተደገፈ ሽበራ” ተፈጽም ኣላ ብዝብል ንቤላሩስ ኮኒነንኣ።

ኣብታ ነፋሪት ቦምባ ክህሉ ከምዝኽእል’ኳ ስግኣት እንተነበረ ዋላ ሓደ ዝተረኸበ ነገር ግን ኣይነበረን ይብል ጸብጻብ ማዕከናት ዜና ቤላሩስ።ኣንፈት ጉዕዞ እታ ነፋሪት ዝተቐየረሉ ምኽንያት ንገያሾ ኣይተሓበሮምን ነይሩ፤ ሓደ ተጓዓዛይ ግን እታ ነፋሪት መገዲ ክትቕይር ከላ፡ ተደላዪ ኣብ ዝነበረ ጋዜጠኛ , ፍርሒ ከምዝተዓዘበ ተዛሪቡ።

“ኣብ ገጹ ፍርሒ ይንበብ ነይሩ። ክትሪኦ’ውን ኣብ ዘሕዝን ኩነታት ነይሩ” ክብል ነቲ ኩነታት ኣረዲኡ።

ሞኒካ ሲምኬኔ ዝተበሃለት ካልእ ተጓዓዚት ድማ፡ ገጹ ናብ ገያሾ መሊሱ መቕጻዕቲ ሞት ከምዝጽበዮ ተዛሪቡ’ዩ” ኢላ።

ጋዜጠኛ ሮማን ፕሮቶቪች ምስተትሓዘ ድማ እታ 171 ገያሾ ሒዛ ዝነበረት ነፋሪት ጉዕዞኣ ክትቕጽል ከምዝተገበረ ተፈሊጡ።ሕብረት ኣውሮጳን ኣባል ሃገራት ኔቶን ኣብቲ ጉዳይ ኢደም ክሕውሱ ጻውዒት ቀሪቡ ኣሎ።

ኣብ ውሽጥን ወጻኢን ዝርከቡ ኤርትራውያን፣ ንመበል 30 ዓመት ናጽነት ኤርትራ፣ ብዝተፈላለየ ኣገባባት ይዝክሩ ኣለዉ

24 ግንቦት መዓልቲ ናጽነት ኤርትራ ኣብ ውሽጥን ወጻኢን ብዝርከቡ ኤርትራውያን ብዝተፈላለየ ኣገባባት ትኽበር ኣላ።
ኣብዚ ኣብ ወጻኢ ሃገራት ዝርከቡ ኤርትራውያን ኣብ ዝተፈላለየ ደምበታት ተኸፋፊሎምሉ ዘለዉ እዋን እትኽበር ዘላ 24 ግንቦት፣ ዝተፈላለየ ትርጉም ይወሃባ እኳ እንተሎ፣ ህዝቢ ኤርትራ ብቃልሱ ናጽነቱ ዘረጋገጸላ ዕለት ብምዃና ንኩሉ ትሓቁፍ ዕለት’ያ።
ኣብዚ እዋን’ዚ ብሓደ ሰብ ብዝምርሑ ውሑዳት ተጨውዩ ዝርከብ ናጽነት ህዝቢ ኤርትራ፣ ንምስሊ’ዛ ዕለት ደዊኑዎ እኳ እንተሎ፣ ብመሪር ቃልሲን መስዋእትን ህዝቢ ዝተረኽበት ብምዃኛ ክዝንጋዕ ከምዘይብሉ ሓያሎ ኤርትራውያን የዘኻኽሩ’ ኣለው።
ህዝቢ ኤርትራ፡ ካብ ኣብ እዋን መግዛእቲ ንላዕሊ ብማእሰርቲ፣ ስደትን ሕሱም መነባብሮን ይግረፍ ስለዘሎ፣ ናጽነት ሃገሩ ከስተማቕርን ምሉእ ሓርነት ክስምዖን ኣብ ዘይክእለሉ ደረጃ ምውዳቑ፡ ገለ ኤርትራውያን ብምረት ይገልጹ።እንተኾነ እዛ ካብ ተኸታታሊ መግዛእታት ስርዓታት ኢትዮጵያ ናጽነት ዝኣወጀት መዓልቲ፣ ብዋጋ መስዋእቲ ብሉጻት ደቂ ህዝቢ ደኣምበር፣ ሕድሪ ብጾቶም ብዝጠለሙን፡ ህርፋን ስልጣን ብዘለዎም ውሑዳትን ብዝፍጸም ዘሎ ግፍዕታትን በደልን ክትግለጽ ከምዘይግባእ’ውን መዘኻኸሪ ይቐርብ ኣሎ።

ኣብ ትግራይ ኣብ ዝፍጸም ዘሎ ገበናት ኢድ ክህልዎም ይክእል’ዩ ዝተባህሉ ሓለፍቲ ጸጥታን ሚሊሻን ክልል ኣምሓራን ህወሓትን’ውን በዚ ናይ ቪዛ እገዳ ተጸልዮም ከምዘለዉ ተሓቢሩ።እቲ ምምሕዳር፣ ኣብ ልዕሊ ሰበ ስልጣን ኢትዮጵያን ኤርትራን ናይ መገሻ እገዳ ዘተግበረ፣ ባይቶ ሰነት ኣመሪካ፣ ሰራዊት መንግስቲ ኤርትራ ካብ ትግራይ ክስሕብ ብምሉእ ድምጺ ድሕሪ ምውሳኑ’ዩ።
ባይቶ ሰነት ኣመሪካ፣ ብ20 ግንቦት ኣብ ዘሕለፎ ውሳኔ፣ ሰራዊት ኤርትራ ብዝቐልጠፈ ካብ ትግራይ ክወጽእ ጥራይ ዘይኮነ፣ ኣብ ትግራይ ከቢድ ምግሃስ ሰብኣዊ መሰላት ዝፈጸሙ ወገናት ክትሕተቱ ከምዘለዎም’ውን ኣስሚርሉ።
መንግስቲ ኢትዮጵያ ይኹን ኣብ ትግራይ ዓስኪሩ ዝርከብ ሰራዊት ኤርትራ፣ ናብ ሰለማዊ ህዝቢ ዝልኣኽ ረዲኤት ካብ ምዕጋት ክቑጠቡ፣ ሰብኣዊ ሓገዛት ብዘይ መሰናኽል ክቕጽል፣ ከምኡ’ውን ኣብ ትግራይ ብዛዕባ ዝተፈጸሙ ገበናት፣ ብናጻ ኣህጉራዊ ኣካል ክጻረ ዝብል’ውን ካብቲ ባይቶ ሰነት ኣመሪካ፣ ብምልኣተ ጉባአ ዘሕለፎ ውሳኔታት’ዩ።
ባይቶ ሰነት ኣመሪካ ዘሕለፎ ውሳኔታት፣ መንግስታት ኤርትራን ኢትዮጵያን ኣብ ግብሪ እንተዘየውዒሎሞ፣ ኣመሪካ ዝተፈላለየ ስጉምታት ክትወስድ ከምእትኽእል ክግለጽ ጸኒሑ’ዩ።ገለ ካብኡ ድማ ናይ ፖሊሲ ምቅይያርን ኣብ ልዕሊ ሰበ ስልጣን መንግስታት ኤርትራን ኢትዮጵያን ድማ እገዳታት ምንባርን ምዃኑ፣ ፎረይን ፖሊስ ኣብ ጸብጻቡ ኣስፉሩ ይርከብ።